Toxic "အဆိပ်အတောက်ဖြစ်စေသော" ဟူသည့်စကားအသုံးအနှုန်းကို လူတွေသုံးတာကြားကတည်းက "အင်း... ဒီစကားလုံးတော့ရေပန်းစားလာပြီး လူတွေပါးစပ်ဖျားမှာအသုံးများလာကြတော့မယ်" လို့တွေးလိုက်မိတယ်။ ကမ္ဘာအဝှမ်းနဲ့အတူ မြန်မာပြည်ဆီပါရောက်လာတဲ့စကားလုံးအသစ်အဆန်းတွေထဲက အသစ်အဆန်းလေးတစ်ခုပေါ့။ လူဆိုတဲ့အမျိုးကလည်း ဆန်းသစ်တာမျိုးမှကြိုက်တတ်တာဆိုတော့ စကားလုံးတောင်မှ အသစ်အဆန်းကိုသုံးပြမှခေတ်မှီတယ်ထင်တတ်ကြတာကိုး။ စကားလုံးတွေနဲ့ပတ်သက်လာရင် တစ်ခုသတိထားရမှာက မိမိပြောနေတဲ့စကားအသုံးအနှုန်းတွေကို အမြဲစီစစ်နေဖို့လိုပါတယ်။ သုံးနှုန်းနေတဲ့စကားလုံးတွေက မိမိကိုခွန်အားဖြစ်စေသလား။ ခွန်အားကျဆင်းနေစေတာလား။
လူ့သဘာဝက မိမိလက်ထဲရောက်လာတဲ့အရာ အသစ်အဆန်းမှန်သမျှအပေါ် အဓိပ္ပာယ်တွေဖွင့်ဆိုကြမယ်။ သတင်းအချက်အလက် (information) တွေ စုဆောင်းမယ်။ သံသယတွေထားမယ်။ Story တွေခင်းမယ်။ ထင်ကြေးနဲ့စွပ်စွဲတဲ့အပြုအမူတွေလုပ်မယ်။ အဆင့်ဆင့်ပြန်လက်ဆင့်ကမ်းမယ်။ ပြန့်ပွားလာမယ်။ ကူးစက်လာမယ်။
"Toxic" ဆိုတဲ့စကားလုံး... ဘယ်လိုစတင်ပြီး အလေးအနက်ထားခံခဲ့ရသလဲ။ ဘယ်သူက စယူဆောင်လာခဲ့သလဲ။ အင်တာနက်ခေတ်ရောက်လာပြီဆိုတော့ မိမိကြည်ညိုလေးစားရတဲ့သူတွေအသုံးပြုတာကိုကြည့်ပြီး မိုက်တယ်ဆိုပြီး လိုက်သုံးကြတာလား... Background မျိုးစုံက လာနိုင်ပါတယ်။
Toxic relationship, toxic work environment, toxic marriage စသဖြင့် toxic ဆိုတဲ့စကားလုံးကိုသုံးနှုန်းရတာခေတ်ဆန်ပါတယ်။ တစ်ခုရှိတာက လူဆိုတာ စကားအသုံးအနှုန်း (language) ရဲ့ဖန်တီးမှုအောက်မှာ တည်ဆောက်နေထိုင်တဲ့သဘာဝရှိတာကြောင့် toxic ဆိုတဲ့စကားသည် လူတွေအတွက် energy ဖြစ်စေတဲ့စကားမဟုတ်သလို အပြစ်သဘော၊ အပျက်သဘောဆောင်တဲ့ပတ်ဝန်းကျင်ကို ဖြစ်ပေါ်စေပါတယ်။ ကောင်းခြင်းဆိုးခြင်းနဲ့မသက်ဆိုင်ပါ။
Toxic ဆိုတဲ့အသုံးအနှုန်းကိုသုံးနေသရွေ့ မိမိရဲ့ energy တွေကျဆုံးနေသလို မိမိဘဝကိုလည်းအဆိပ်အတောက်တွေကြားထဲပို့ဆောင်နေသလိုပါပဲ။ Relationship တွေမှာ toxic လို့သုံးနှုန်းမယ့်အစား "အခန့်မသင့်အငြင်းပွားတတ်ကြပါတယ်" လို့သုံးနှုန်းရင် အခြေအနေတွေကိုဖြေရှင်းတဲ့အခါ ပိုလွယ်ကူမယ်လို့ယူဆပါတယ်။
"စကားနောက်တရားပါ" ဆိုတဲ့စကားပုံလိုပါပဲ။ စကားအသုံးအနှုန်း (language) တွေက Power ရှိပါတယ်။ မိမိပါးစပ်ဖျားပေါ်တင်လိုက်တယ်ဆိုရင်ပဲ မိမိ၊ မိမိဘဝနဲ့ မိမိကမ္ဘာကို မိမိကိုယ်တိုင်ဖန်တီးလိုက်သလို ခံစားရပါလိမ့်မယ်။ မိမိရဲ့ဖြစ်တည်ခြင်း (Being) ကိုပါ ဖန်တီးပေးပါတယ်။ ဒါကြောင့် မိမိဘဝပျော်ရွှင်သာယာကြည်လင်ချင်ရင် စကားအသုံးအနှုန်းတွေကို စီစစ်ပြီးသုံးနှုန်းကြပါ။ အဆိပ်အတောက်ဖြစ်စေသော (Toxic) ဆိုတဲ့စကားအပေါ်လိုက်ပြီး အဆိပ်ရှိတဲ့သူတွေနဲ့ဆုံတွေ့ရတယ်... ပြီးရင် အဆိပ်မိနေတဲ့ victim (ခံရသူသားကောင်) ဘဝမျိုးရောက်ရပါတယ်ဆိုပြီး မိမိကိုယ်တိုင်ကမဖန်တီးမိဖို့လိုပါတယ်။
Toxic ဆိုတဲ့စကားလုံးက ကျွန်မနမူနာအနေနဲ့ဖော်ပြခြင်းပါ။ အလားတူ ကိုယ့်ကိုခွန်အားကျစေမယ့် အခြားသောစကားလုံးအသုံးအနှုန်းတွေမှာလည်း သတိပြု၊ ဆင်ခြင်ဖို့လိုပါတယ်။ စကားအသုံးအနှုန်းတွေရဲ့အနောက်မှာ ခံစားချက်၊ ဟန်ပန်အနေအထားနဲ့ တုံ့ပြန်မှုတွေပါလာတတ်ပါတယ်။
Language has power, be aware of how you use your language.
မှတ်ချက်။ တကယ်တော့ toxic ဆိုတဲ့စကားလုံးက တိရစ္ဆာန်နဲ့ အစားအသောက်တွေမှာသာသုံးနှုန်းဖို့ တီထွင်ခဲ့တာလို့ယူဆရပါတယ်။
Thida Aung
Sep 13, 2022 (Tuesday)
